மட்டக்களப்பு பகுதியில் 14 வயது சிறுமி ஒருவரைப் பாலியல் துஷ்பிரயோகத்திற்கு உட்படுத்திய குற்றச்சாட்டில், பாதிக்கப்பட்ட சிறுமியின் பெரியப்பாவுக்கு 20 ஆண்டுகள் கடூழியச் சிறைத்தண்டனை விதித்து மட்டக்களப்பு மேல் நீதிமன்றம் தீர்ப்பளித்துள்ளது.
கடந்த 2020ஆம் ஆண்டு பெப்ரவரி 23ஆம் திகதியன்று, சட்டரீதியான பாதுகாப்பில் இருந்த 14 வயதுடைய சிறுமியை வலுக்கட்டாயமாகக் கவர்ந்து சென்று பாலியல் துஷ்பிரயோகம் செய்ததாகக் குற்றம் சுமத்தப்பட்டு குறித்த நபர் காவல்துறையினரால் கைது செய்யப்பட்டிருந்தார். பின்னர் இந்த வழக்குத் தொடர்பான விசாரணைகள் மட்டக்களப்பு மேல் நீதிமன்றத்தில் தீவிரமாக நடைபெற்று வந்தன.
வழக்குத் தொடுநர் தரப்பில் அரச சட்டவாதிகள் ஆஜராகி வாதாடியதைத் தொடர்ந்து, விசாரணைகள் யாவும் நிறைவடைந்து கடந்த செப்டெம்பர் மாதம் குறித்த நபர் குற்றவாளியாக உறுதிப்படுத்தப்பட்டார். அதனைத் தொடர்ந்து நீதிபதி ரி. ஜே. பிரபாகரன் இந்த வழக்கிற்கான தீர்ப்பை உத்தியோகபூர்வமாக அறிவித்தார்.
இதற்கமைய, சிறுமியைக் கவர்ந்து சென்றமைக்காக 5 ஆண்டுகள் கடூழியச் சிறைத்தண்டனையும் 10 ஆயிரம் ரூபாய் அபராதமும், பாலியல் துஷ்பிரயோகம் செய்தமைக்காக 15 ஆண்டுகள் கடூழியச் சிறைத்தண்டனையும் 10 ஆயிரம் ரூபாய் அபராதமும் விதிக்கப்பட்டுள்ளது. இந்தத் தண்டனைகள் ஒன்றன்பின் ஒன்றாக அனுபவிக்கப்பட வேண்டும் என உத்தரவிடப்பட்டுள்ளதன் மூலம் குற்றவாளிக்கு மொத்தமாக 20 ஆண்டுகள் கடூழியச் சிறைத்தண்டனை உறுதி செய்யப்பட்டுள்ளது.
மேலும், பாதிக்கப்பட்ட சிறுமிக்கு ஒரு இலட்சம் ரூபாய் நஷ்டஈடு வழங்குமாறும், அதனைச் செலுத்தத் தவறினால் மேலதிகமாக இரண்டு ஆண்டுகள் சாதாரண சிறைத்தண்டனை அனுபவிக்க வேண்டும் என்றும் நீதிமன்றம் தனது தீர்ப்பில் கடுமையாக எச்சரித்துள்ளது.
