மேல் மாகாணத்திற்கு மாத்திரம் மட்டுப்படுத்தப்பட்டிருந்த நவீன மெட்ரோ பேருந்து சேவையை நாட்டின் ஏனைய பிரதான மாகாணங்களுக்கும் விரிவுபடுத்தும் திட்டத்தின் கீழ், யாழ்ப்பாணம், கண்டி மற்றும் காலி ஆகிய நகரங்களிலும் விரைவில் இச்சேவை ஆரம்பிக்கப்படவுள்ளதாகப் போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் விமல் ரத்நாயக்க உத்தியோகபூர்வமாக அறிவித்துள்ளார். முதற்கட்டமாக மேல் மாகாணத்தில் வெற்றிகரமாக முன்னெடுக்கப்பட்டு வரும் இந்த நவீன போக்குவரத்துச் சேவையை, நாட்டின் ஏனைய பிராந்தியங்களுக்கும் விஸ்தரிக்கும் அரசாங்கத்தின் கொள்கைத் திட்டத்திற்கு இணங்க இந்த நடவடிக்கை எடுக்கப்பட்டுள்ளது.
இதற்கமைய, நடப்பாண்டின் இறுதிக்குள் யாழ்ப்பாணம் மற்றும் கண்டி ஆகிய மாவட்டங்களில் பிரத்தியேக மெட்ரோ பேருந்து depots எனப்படும் முனையங்களை நிறுவுவதற்கான ஆரம்பக் கட்டப் பணிகள் தீவிரமாக முன்னெடுக்கப்பட்டு வருவதாக அமைச்சு சுட்டிக்காட்டியுள்ளது. வெளிநாடுகளில் இருந்து இறக்குமதி செய்யப்படவுள்ள மேலதிக பேருந்துத் தொகுதிகள் மற்றும் நவீன தொழில்நுட்ப வசதிகளுடன் கூடிய ஒருங்கிணைந்த கட்டண முறைகள் என்பன இச்சேவையில் இணைக்கப்படவுள்ளன. எதிர்காலத்தில் இயக்கப்படும் இந்த நவீன மெட்ரோ பேருந்துகளில் பயணிகளுக்கான அறிவிப்புகள் சிங்களம், தமிழ் மற்றும் ஆங்கிலம் ஆகிய மும்மொழிகளிலும் இடம்பெறும் வகையில் ஏற்பாடுகள் செய்யப்பட்டுள்ளமை குறிப்பிடத்தக்கது. இதன் மூலம் வடக்கு மாகாணம் மற்றும் ஏனைய பிராந்தியப் பொதுமக்களின் நீண்ட காலப் போக்குவரத்துச் சிரமங்கள் பெருமளவு நிவர்த்தி செய்யப்படும் என எதிர்பார்க்கப்படுகிறது.
