நடப்பு 2026ஆம் ஆண்டில் 2.5 லட்சம் (250,000) இலங்கையர்களுக்கு வெளிநாட்டு வேலைவாய்ப்புகளை வழங்க இலங்கை வெளிநாட்டு வேலைவாய்ப்பு பணியகம் (SLBFE) திட்டமிட்டுள்ளதாக அறிவித்துள்ளது. இலங்கை அரசாங்கம் மற்றும் பணியகத்தில் பதிவுசெய்யப்பட்ட வெளிநாட்டு வேலைவாய்ப்பு முகவர் நிலையங்கள் ஊடாக இந்த வேலைவாய்ப்புகள் வழங்கப்படவுள்ளன.
மத்திய கிழக்கில் நிலவும் போர்ப் பதற்றச் சூழல் காரணமாக, அப்பகுதிக்கான இலங்கையர்களின் வருகையில் சிறிய வீழ்ச்சி தென்பட்ட போதிலும், பாதுகாப்பான நாடுகளிலுள்ள அதிக சம்பளம் கொண்ட வேலைகளுக்குப் பணியாளர்களை அனுப்பப் பணியகம் நடவடிக்கை எடுத்து வருகிறது.
இதன்படி, இந்த ஆண்டின் இதுவரையிலான காலப்பகுதியில் 143,087 இலங்கையர்கள் வேலைவாய்ப்புகளுக்காக வெளிநாடுகளுக்குச் சென்றுள்ளனர். அவர்களுள் 92,590 ஆண்களும் 50,497 பெண்களும் அடங்குவர்.
இலங்கைப் பணியாளர்கள் மத்தியில் மிகுந்த வரவேற்பைப் பெற்றுள்ள இஸ்ரேலுக்கு 14,000 பணியாளர்களை அனுப்பத் திட்டமிடப்பட்டுள்ள நிலையில், இதுவரை 7,873 பேர் அங்கு சென்றுள்ளனர். அதேபோன்று தென்கொரியாவிற்கு 8,000 பேரை அனுப்ப இலக்கு நிர்ணயிக்கப்பட்டு, இதுவரை 4,794 பேர் அங்கு சென்றுள்ளதாகவும் தெரிவிக்கப்பட்டுள்ளது.
மேலும், 2026இல் இதுவரை வெளிநாடு சென்றவர்களில் 73,623 பேர் திறனுள்ள தொழில்களுக்காகவும் (Skilled Jobs), 69,494 பேர் திறனற்ற தொழில்களுக்காகவும் சென்றுள்ளதாகப் பணியகத்தின் தரவுகள் தெரிவிக்கின்றன.
இதனிடையே, இந்த ஆண்டின் ஜனவரி முதல் ஜூன் வரையிலான முதற்பாதியில் வெளிநாடுகளிலுள்ள இலங்கைப் பணியாளர்கள் மூலமாக 4.6 பில்லியன் அமெரிக்க டாலர் அந்நிய செலவாணி இலங்கைக்கு அனுப்பி வைக்கப்பட்டுள்ளமை குறிப்பிடத்தக்கது.
