அநுராதபுர புனித நகரின் அபிவிருத்தித் திட்டத்தின் முன்னேற்றத்தை ஆராய்வதற்காக ஜனாதிபதி அநுரகுமார திசாநாயக்க நேற்று (23) அங்கு நேரில் விஜயம் செய்துள்ளார்.
சுமார் 7.7 பில்லியன் ரூபா மதிப்பீட்டில் முன்னெடுக்கப்படவுள்ள இந்த அபிவிருத்தித் திட்டத்திற்கு இந்திய அரசாங்கம் நிதியுதவி வழங்க இணக்கம் தெரிவித்துள்ளது. வரலாற்று முக்கியத்துவமும் மதப் பெறுமதியும் கொண்ட அநுராதபுர புனித நகரின் தொன்மையைப் பாதுகாத்து, அங்கு வரும் பக்தர்கள் மற்றும் உள்நாட்டு, வெளிநாட்டு சுற்றுலாப் பயணிகளுக்கான வசதிகளை மேம்படுத்துவதே இத்திட்டத்தின் பிரதான நோக்கமாகும்.
விஜயத்தின்போது ஜனாதிபதி, புனித நகரிலுள்ள மூன்று வரலாற்று நீர்த்தேக்கங்களைச் சூழவுள்ள வீதி அபிவிருத்திப் பணிகளைப் பார்வையிட்டதுடன், மேற்கு மடாலய வளாகத்தில் இடம்பெறும் தொல்லியல் அகழ்வாராய்ச்சிப் பணிகளையும் ஆய்வு செய்துள்ளார்.
அத்துடன், ருவன்வெலிசாயவுக்கு அருகிலுள்ள அட்டமஸ்தானப் பகுதியில் வாகனத் தரிப்பிடத்தை அமைப்பதற்காக முன்மொழியப்பட்டுள்ள இடத்தையும் பார்வையிட்டு, திட்டத்தின் முன்னேற்றம் தொடர்பில் அதிகாரிகளிடம் கேட்டறிந்துள்ளார்.
புனித நகரில் மேற்கொள்ளப்படும் அனைத்து அபிவிருத்திப் பணிகளும் அதன் வரலாற்றுத் தொன்மை மற்றும் மத முக்கியத்துவத்தைப் பாதிக்காத வகையில் முன்னெடுக்கப்பட வேண்டும் என ஜனாதிபதி வலியுறுத்தியுள்ளார். திட்டத்தை நடைமுறைப்படுத்தும்போது ஏற்படும் பிரச்சினைகளை சம்பந்தப்பட்ட அனைத்துத் தரப்பினருடனும் கலந்துரையாடித் தீர்த்து, பணிகளை விரைவுபடுத்துமாறும் அதிகாரிகளுக்கு அறிவுறுத்தியுள்ளார்.
இந்த அபிவிருத்தித் திட்டத்தின் கீழ் அணுகு வீதிகளைப் புனரமைத்தல், பக்தர்களுக்கான வசதிகளை மேம்படுத்துதல், கழிவு முகாமைத்துவம் மற்றும் சுகாதார வசதிகளைச் சீரமைத்தல் உள்ளிட்ட நடவடிக்கைகள் முன்னெடுக்கப்படவுள்ளன.
இதற்கிடையில், ஜனாதிபதி வரலாற்றுப் புகழ்பெற்ற ருவன்வெலிசாய தூபியில் வழிபாடுகளில் ஈடுபட்டு ஆசீர்வாதங்களையும் பெற்றுக்கொண்டுள்ளார். அங்கு வருகை தந்த பொதுமக்களையும் சந்தித்து அவர்களின் நலன்கள் குறித்துக் கேட்டறிந்துள்ளார்.
புனித நகரின் வரலாற்றுப் பாரம்பரியத்தைப் பாதுகாப்பதுடன், அபிவிருத்திப் பணிகளைத் துரிதப்படுத்துவதற்கான நடவடிக்கைகளைத் தொடருமாறு ஜனாதிபதி அதிகாரிகளுக்கு அறிவுறுத்தியுள்ளதாக ஜனாதிபதி ஊடகப் பிரிவு தெரிவித்துள்ளது.
