கொழும்பு விகாரமகாதேவி பூங்காவில் பௌத்த தேரர்கள் முன்னெடுத்து வந்த சத்தியாக்கிரகப் போராட்டம் தற்காலிகமாக நிறுத்தப்பட்டுள்ளதாக அறிவிக்கப்பட்டுள்ளது.
பொதுபலசேனா அமைப்பின் பொதுச் செயலாளர் கலகொட அத்தே ஞானசார தேரரை விடுதலை செய்யுமாறு கோரி, கடந்த 10 நாட்களாக இந்தப் போராட்டம் முன்னெடுக்கப்பட்டு வந்தது.
இந்நிலையில், மூன்று பௌத்த பீடங்களின் மகாநாயக்க தேரர்கள் தலையிட்டு, ஞானசார தேரரின் விடுதலை தொடர்பாக அரசாங்கத்துடன் பேச்சுவார்த்தை நடத்தி தீர்வைப் பெற்றுக்கொள்வதற்கான நடவடிக்கைகளை முன்னெடுப்பதாக எழுத்துமூலம் அறிவித்துள்ளனர்.
இதனையடுத்து, மகாநாயக்க தேரர்கள் வழங்கிய ஆலோசனையை ஏற்று போராட்டத்தைத் தற்காலிகமாக நிறுத்தத் தீர்மானித்துள்ளதாக உலப்பனை சுமங்கல தேரர் தெரிவித்துள்ளார்.
இதேவேளை, போராட்டத்தை முடிவுக்குக் கொண்டுவருவதற்காக நீதிமன்ற உத்தரவைப் பெறும் நோக்கில் மீண்டும் நீதிமன்றத்தை அணுகப் பொலிஸார் நடவடிக்கை எடுத்து வருவதாகவும் தெரிவிக்கப்பட்டுள்ளது.
ஞானசார தேரரின் விடுதலை தொடர்பாக மகாநாயக்க தேரர்கள் முன்னெடுக்கவுள்ள பேச்சுவார்த்தைகளின் முன்னேற்றத்தைப் பொறுத்து அடுத்தகட்ட நடவடிக்கைகள் அமையும் என எதிர்பார்க்கப்படுகிறது.
