அரச ஊழியர்களின் சம்பளத்தை அதிகரிப்பதுடன், அவர்களுக்கான ஏனைய வசதிகள் மற்றும் கொடுப்பனவுகளையும் எதிர்காலத்தில் மேம்படுத்த நடவடிக்கை எடுக்கப்படும் என விவசாயம் மற்றும் கால்நடை வளத்துறை அமைச்சர் கே.டி. லால்காந்த தெரிவித்துள்ளார்.
ஊடகங்களுக்குக் கருத்துத் தெரிவிக்கும்போதே அவர் இதனைக் குறிப்பிட்டுள்ளார்.
நாட்டின் அரச சேவையை மேலும் வலுப்படுத்துவது அரசாங்கத்தின் முக்கிய நோக்கமாக உள்ளதாகத் தெரிவித்த அமைச்சர், தற்போது அரச சேவையில் போதியளவு பணியாளர்கள் இல்லாமையும் பல பதவிகள் வெற்றிடமாக இருப்பதும் சவாலாக உள்ளதாகக் குறிப்பிட்டுள்ளார்.
இந்த வெற்றிடங்களை நிரப்புவதற்கான ஆட்சேர்ப்பு நடவடிக்கைகள் ஏற்கனவே ஆரம்பிக்கப்பட்டுள்ளதாகவும், படிப்படியாக அனைத்து வெற்றிடங்களையும் நிரப்பி அரச சேவைக்குத் தேவையான பணியாளர் எண்ணிக்கையைப் பூர்த்தி செய்யத் திட்டமிடப்பட்டுள்ளதாகவும் அவர் தெரிவித்துள்ளார்.
இதற்கு மேலதிகமாக, அரச ஊழியர்களின் சம்பளத்தை அதிகரிப்பதுடன், அவர்களுக்குக் கிடைக்க வேண்டிய ஏனைய வசதிகள் மற்றும் கொடுப்பனவுகளையும் மேம்படுத்த நடவடிக்கை எடுக்கப்படும் என அமைச்சர் கூறியுள்ளார்.
அரச சேவையை வலுப்படுத்தாமல் நாட்டின் அபிவிருத்தியை எதிர்பார்க்க முடியாது எனச் சுட்டிக்காட்டிய அவர், அரசாங்கம், அரச ஊழியர்கள் மற்றும் பொதுமக்கள் ஒன்றிணைந்து செயற்படுவதன் மூலமே நாட்டைக் கட்டியெழுப்ப முடியும் என்றும் தெரிவித்துள்ளார்.
கடந்த காலங்களில் பலவீனமடைந்த அரச சேவையை மீண்டும் வலுப்படுத்துவதற்கான நடவடிக்கைகளை அரசாங்கம் முன்னெடுத்து வருவதாகவும் அமைச்சர் கே.டி. லால்காந்த மேலும் குறிப்பிட்டுள்ளார்.
எனினும், சம்பள அதிகரிப்பு நடைமுறைக்கு வரும் திகதி, அதிகரிக்கப்படும் தொகை மற்றும் ஏனைய கொடுப்பனவுகள் குறித்த விரிவான விபரங்கள் இந்த அறிவிப்பில் வெளியிடப்படவில்லை.
