இலங்கையின் பல்வேறு பகுதிகளில் அடுத்த சில நாட்களுக்குப் பிற்பகல் வேளைகளில் இடியுடன் கூடிய மழை பெய்வதற்குச் சாதகமான வளிமண்டல நிலைமைகள் உருவாகியுள்ளதால், சில இடங்களில் 75 மில்லிமீற்றருக்கும் அதிகமான கனமழை பெய்யக் கூடும் என வளிமண்டலவியல் திணைக்களம் எச்சரிக்கை விடுத்துள்ளது. இந்த வானிலை முன்னறிவிப்புத் தகவல்கள் இன்று (21.11.2026) வெளியிடப்பட்டுள்ளன.
குறிப்பாக மேல், சப்ரகமுவ, வடமேல், மத்திய மற்றும் ஊவா மாகாணங்களின் பல இடங்களிலும், அத்துடன் காலி மற்றும் மாத்தறை மாவட்டங்களிலும் மாலை மற்றும் இரவு வேளைகளில் மழையோ அல்லது இடியுடன் கூடிய மழையோ பெய்யக் கூடும் என எதிர்பார்க்கப்படுகிறது. குறிப்பிட்ட இப்பகுதிகளில் சில இடங்களில் 75 மில்லிமீற்றருக்கும் அதிகமான ஓரளவு பலத்த மழைவீழ்ச்சி பதிவாக வாய்ப்புள்ளதாக வளிமண்டலவியல் திணைக்களம் சுட்டிக்காட்டியுள்ளது. இதேவேளை, நாட்டின் பெரும்பாலான பகுதிகளில் அதிகாலை வேளைகளில் பனிமூட்டமான நிலைமை நிலவக் கூடும் எனவும் தெரிவிக்கப்பட்டுள்ளது. இடியுடன் கூடிய மழை பெய்யும் சந்தர்ப்பங்களில் தற்காலிகமாக வீசக் கூடிய உள்ளூர் பலத்த காற்று மற்றும் மின்னல் தாக்கங்களினால் ஏற்படக் கூடிய பாதிப்புகளைக் குறைத்துக் கொண்டு பாதுகாப்பாக இருக்குமாறு பொதுமக்கள் அறிவுறுத்தப்பட்டுள்ளனர்.







