களிமண்ணால் செய்யப்பட்ட உருவங்களில் ஊசிகளைச் செருகுவது உள்ளிட்ட விசித்திரமான போராட்ட நடவடிக்கைகளில் ஈடுபடும் சில எதிர்க்கட்சிக் குழுக்களை ஜனாதிபதி அநுரகுமார திசாநாயக்க விமர்சித்துள்ளார்.
தேசிய அறிவுஜீவிகள் அமைப்பின் தேசிய மாநாட்டில் இன்று (31) உரையாற்றியபோதே அவர் இதனைத் தெரிவித்துள்ளார்.
குறித்த செயல்களின் பின்னணியில் காணப்படும் மனநிலை குறித்தும் ஜனாதிபதி கேள்வி எழுப்பியுள்ளார்.
கடந்த கால அரசியல் கலாசாரத்தின் மூலம் நன்மையடைந்த சில குழுக்கள், தேசிய மக்கள் சக்தி அரசாங்கம் அறிமுகப்படுத்தும் மாற்றங்களை ஏற்றுக்கொள்ள முடியாமல் சிரமப்படுவதாக அவர் குறிப்பிட்டுள்ளார்.
அரசாங்கத்தின் அரசியல் சீர்திருத்தங்களுக்கு எதிராக இக்குழுக்கள் வெறுப்புணர்வைத் தூண்டும் கருத்துகள், ஆதாரமற்ற குற்றச்சாட்டுகள் மற்றும் வழக்கத்திற்கு மாறான போராட்ட நடவடிக்கைகளில் ஈடுபடுவதாகவும் ஜனாதிபதி குற்றஞ்சாட்டியுள்ளார்.
களிமண் உருவத்தில் ஊசிகளைச் செருகுவதன் மூலம் மற்றொருவருக்கு வலியை ஏற்படுத்த முடியும் என நம்புவதற்குப் பின்னால் எத்தகைய சிந்தனை இருக்கிறது என்றும் அவர் கேள்வி எழுப்பியுள்ளார்.
அண்மையில் ஜனாதிபதிக்கு எதிராகச் சூனியம் செய்வதாகக் கூறப்படும் நடவடிக்கைகள் தொடர்பில் சர்ச்சைகள் எழுந்திருந்த பின்னணியில், அவர் இவ்வாறு கருத்துத் தெரிவித்துள்ளமை குறிப்பிடத்தக்கது.
