இலங்கையை அண்மித்த வளிமண்டலப் பகுதியில் நிலவிவரும் தாழ்வுப் பகுதியின் தாக்கம் தொடர்ந்து நீடித்து வருவதால், நாட்டின் பல பகுதிகளிலும் இன்றும் (23.10.2026) பலத்த மழை பெய்யக்கூடும் என வளிமண்டலவியல் திணைக்களம் எச்சரித்துள்ளது.
நாட்டின் பல்வேறு பிரதேசங்களிலும் தொடரும் சீரற்ற காலநிலை காரணமாக, சில இடங்களில் 75 மில்லிமீற்றருக்கும் அதிகமான கனமழை பெய்யக்கூடும் என எதிர்வு கூறப்பட்டுள்ளது. இலங்கையை விட்டு விலகிச் செல்லும் வகையில் தாழ்வுப் பகுதி மேற்கு திசையில் நகர்ந்து கொண்டிருந்தாலும், அதன் மறைமுகத் தாக்கம் மற்றும் வளிமண்டலக் குழப்பநிலை காரணமாக நாடளாவிய ரீதியில் பலத்த மழையுடனான சூழல் நிலவுகிறது. குறிப்பாக, கடந்த சில நாட்களாக பெய்த தொடர் கனமழை காரணமாக நாட்டின் பல முக்கிய நீர்த்தேக்கங்கள் வான்பாயும் நிலையை எட்டியுள்ளன. எனவே, தாழ்வுப் பகுதியின் நகர்வுகள் மற்றும் காலநிலை மாற்றங்கள் குறித்து வளிமண்டலவியல் திணைக்களம் மற்றும் உரிய பாதுகாப்புப் பிரிவுகள் விடுத்துள்ள எச்சரிக்கைகளைப் பொதுமக்கள் தொடர்ந்தும் அவதானத்துடன் பின்பற்றுமாறு அறிவுறுத்தப்படுகிறார்கள்.
